As citacións para algúns médicos no Centro de Saúde de Viveiro (Lugo) van suspenderse ata o próximo día dous de xaneiro de 2024, segundo denunciou a Plataforma na Defensa da Sanidade Pública da Mariña.
Nun comunicado, este colectivo advertiu da “situación de caos” do ambulatorio que “provocará que moitas persoas queden sen médico de familia e teñan que visitar a algún dos outros profesionais do centro”.
Segundo informou a plataforma, isto suporá “unha sobrecarga para o resto do persoal”, que terá que asumir aos pacientes que quedan sen médico, e afectará tamén as persoas que non poidan pedir unha cita co seu doutor.
Recalcan que é unha “situación especialmente grave para a Atención Primaria”, posto que unha dos seus principais características é a proximidade e confianza entre profesional e paciente para lograr unha boa relación que favoreza á evolución positiva das posibles doenzas das persoas.
Desde a plataforma afirman que xa desconfiaban das “boas noticias” que lles trasladaba o pasado domingo a Xerencia, e esixen á Xunta que pare de “enganar á xente e comece a solucionar os problemas que ten encima”, problemas que, segundo aseguran, son “os únicos responsables”.
XUNTA CUALIFICA DE “TERXIVERSACIÓN”
Ante o comunicado de Defensa da Sanidade, fontes da xerencia da área sanitaria de Lugo trasladaron a Europa Press que a denuncia é “unha terxiversación” que “non ten nada que ver coa realidade” posto que as axendas ás que se refire aténdense a través de “outros profesionais do centro” mentres non se resolve un concurso.
Argumenta que estas dúas axendas corresponden a dúas prazas vacantes, das cales, unha delas foi sacada nun concurso de méritos “que está a punto” de ser resolto e que dotará ao centro de saúde de Viveiro “do cuarto médico fixo”.
“Os pacientes adscritos a esa cota están a ser atendidos polos outros profesionais do centro de saúde, cuxa colaboración , traballo e esfurzo agradecemos, unha vez máis, desde a xerencia da área sanitaria”, engaden estas fontes que inciden en que se trata dunha “cuestión de organización interna do traballo”.
