O conselleiro do Mar, Alfonso Villares, remarcou o futuro acondicionamento do edificio dos locais dos armadores no porto de San Cibrao no municipio lucense de Cervo, ao que a Xunta destinará o próximo ano 375.000 euros. Así o sinalou durante unha visita á localidade e resaltou o impacto positivo destas melloras nas condicións de traballo dos profesionais do mar desta zona.

Segundo informou a Xunta, o proceso de licitación está “moi avanzado” por parte de Portos de Galicia e o pasado día 29 finalizou o prazo de presentación de ofertas para o proxecto polo que actuarán nos tres edificios de locais de armadores do porto. O titular de Mar destacou o esforzo investidor que o Executivo autonómico recolle nos orzamentos para o próximo ano con novas actuacións noutros portos da Mariña, como os de Burela, Foz e Ribadeo.