O alcalde de Barreiros, Alfonso Fuente Parga, visitou este martes as obras da depuradora de Celeiro de Mariñaos, que agarda que estean “rematadas nuns días”.
A estación de tratamento de auga potable (Etap) conta cun investimento de un millón de euros. Tentará paliar as deficiencias do abastecemento de auga postas de relieve polas choivas. “Cando o río baixaba revolto, tamén por obras no cauce, ocasionaba que a auga saíse con turbidez”, expón Fuente Parga.
O primeiro edil de Barreiros está convencido de que “unha vez se poña en marcha esta nova depuradora, iso xa quedará solucionado”.
AUMENTO PRODUTIVO
Así mesmo, a instalación amplía a capacidade de produción de auga potable, e tamén se aumentou o depósito de cabeceira. “Tiña capacidade de 900 metros cúbicos e agora xa contamos cun de 2.000 metros cúbicos”, explica Fuente Parga.
