O Concello de Cervo anunciou que iniciou os trámites para ampliar o Museo do Mar de San Cibrao.
O goberno local sinala que a páxina web da Consellería de Medio Ambiente expón o documento da modificación puntual das normas subsidiarias de planeamento municipal redactado para ampliar o museo.
O ámbito proposto para levar a cabo a ampliación abrangue, ademais do edificio existente, unha edificación privada empregada antigamente como vivenda.
Nestes terreos nos que se proxecta o aumento do espazo do Museo establécese a ordenanza residencial mixta -espazo destinado xeralmente á vivenda e usos complementarios-.
Na pinacoteca establécese a ordenanza dotacional propia de espazos en ordenación aberta, destinados a usos dotacionais ou servizos de interese público, tales como o escolar, o deportivo, o recreativo, o relixioso, o sanitario ou o asistencial.
Así, o cambio nas condicións urbanísticas permitirá o uso dotacional da superficie total da finca, que é de 2.568 metros cadrados.
AMPLIACIÓN DA PINACOTECA
Segundo expuxo o alcalde de Cervo, o popular Alfonso Villares, “esta modificación é o documento de partida para acadar o obxectivo de incorporar o terreo contiguo para a ampliación do museo. Así, mellorará a calidade e funcionalidade da pinacoteca e favorecerase a posta en valor do noso patrimonio cultural”, concluíu.