Un albergue e un edificio de apartamentos turisticos ampliará a oferta de aloxamentos de Mondoñedo. O proxecto hosteleiro ubicarase entre as rúas Alfonso VII e Pardo de Cela, unha das entradas do Camiño de Santiago na cidade.
Os promotores rehabilitarán o inmoble que ocupa o solar, que leva dez anos apuntalado por unha estrutura metálica.
A alcaldesa, Elena Candia, que informou da concesión da licenza de obras esta semana, destacou a importancia desta actuación para “adecentar” a imaxe que ofrece a rúa.
Dacordo co establecido na licenza, os traballos, orzamentados en 750.000 euros, terán que comezar antes de seis meses. O prazo para a execución total das obras é de tres anos, aínda que poderá concederse unha prórroga.
O edificio albergará dous establecementos totalmente independentes entre si, un para apartamentos turísticos e outro para un albergue, ademais dun aparcamento para dar servizo a ambos.
ALOXAMENTOS PARA PEREGRINOS
A rexedora felicitouse polo “interese económico que está a espertar o Concello a través de iniciativas enfocadas a recibir aos peregrinos”.
O proxecto ampliará o número de prazas de aloxamento que ofrece a cidade para os camiñantes. Ademais da oferta hosteleira convencional, Mondoñedo conta cun albergue municipal, con 24 prazas, e outro privado, inaugurado en 2016, con 34.
FIN DE ETAPA DO CAMIÑO NORTE
O goberno municipal aposta por proxectar Mondoñedo como fin da etapa de entrada do Camiño Norte de Santiago a Galicia. Do 10 ao 12 de febreiro, o concello presentou a súa oferta no Fórum Fairway, unha feira e congreso internacional especializado na ruta xacobea.