A viúva de Melchor Roel, Carmen López Saavedra, recolleu este domingo unha escultura que simboliza o recoñecemento de Comisións Obreiras (CC OO) ao ex alcalde de Viveiro, falecido no 2013, pola súa labor sindical.
Rexedor do municipio viveirense entre 2003 e 2013, Roel foi distinguido nun acto celebrado en Ferrol que contou coa presenza do secretario xeral de CC OO en Galicia, Ramón Sarmiento, e da subdelegada de Goberno central en Lugo, Isabel Rodríguez.
Os premios 10 de marzo que concede Comisións Obreiras coinciden coa festividade do Día da Clase Obreira galega, con motivo do cabodano do asasinato dos sindicalistas Amador Rey e Daniel Niebla.
Os outros premiados nesta edición dos galardóns 10 de marzo de CCOO foron Hortensia Álvarez Folgar e Xan López Facal.
“MOI MERECIDO”
López Saavedra agradeceu o tributo no nome da familia de Roel, mentres que Rodríguez destacou que se trata dun recoñecemento “moi merecido” pola súa traxectoria vital, sindical e política, na que sempre se significou pola súa defensa dos valores da “igualdade e a solidariedade“.
- Advertisement -
No acto tamén tomaron parte os alcaldes de Viveiro, María Loureiro, e de Ferrol, Jorge Suárez, ademais dos dirixentes do sindicato Unai Sordo, secretario xeral da Confederación Sindical de CCOO; e Aurea Vázquez, secretaria xeral da Unión Comarcal de Ferrol.
