A Xunta de Galicia aclarou este martes a través dun comunicado que “ningunha normativa autonómica” prohibe en Galicia “a celebración de actividades musicais ao aire libre ou en locais pechados, nin moito menos os Cantos de Taberna”.

O Executivo autonómico afirma que “nin a Lei de espectáculos públicos vixente na actualidade, nin a lexislación en materia de control de ruído” conteñen cláusulas privativas destas actividades.

O Goberno galego asegura que se veu “na obriga” de “desmentir a información difundida polo goberno local de Ribadeo”, que asegurou que promoveu unha modificación da ordenanza municipal de protección medioambiental para posibilitar que se realicen este tipo de actividades.

A suposta prohibición, asegura a Administración autonómica, responde a “un bulo” que foi “refutado en múltiples ocasións”. A Xunta asegura que “o único cambio ao respecto é que agora serán os distintos concellos os encargados de autorizar estes espectáculos”.

Desde a Xunta aclaran que a ordenanza tipo contra a contaminación acústica, aprobada o pasado mes de decembro, busca facilitar que todos os concellos desenvolvan a súa propia normativa en materia de ruído e de límites acústicos.

EXCEPCIÓNS AOS LÍMITES

A normativa autonómica, apunta, “inclúe a posibilidade de autorizar excepcións aos límites de ruído en caso de espectáculos públicos e actividades recreativas que se realicen ao aire libre ou en recintos sen as debidas medidas de illamento, sempre que así se xustifique por razóns de especial proxección oficial, cultural ou relixiosa”.

As devanditas excepcións, especifica o Executivo autonómico, “aparecen reguladas no artigo 9 da proposta de Ordenanza de protección contra a contaminación acústica de Galicia, no artigos 7 do Decreto 106/2015, do 9 de xullo, de contaminación acústica de Galicia e no artigo 9 da Lei 37/2003, do 17 de novembro, isto é na Lei estatal de ruído”.