Xove acollerá o 18 de abril, Xoves Santo, a décimo oitava edición da Festa do Polbo da Pedra.
O alcalde de Xove, o popular Demetrio Salgueiro, e hostaleiros asociados á ACIAM do municipio presentaron o cartel desta nova edición e anunciaron a data da exaltación gastronómica, que cumpre a súa maioría de idade.
A partir das 12.00 horas, os locais de hostalería de Xove ofrecerán o molusco cefalópodo en ata dez especialidades: á feira, en empanada, ao allo, á grella, en vinagreta, con queixo de San Simón, á mariñeira, con mollo de allo, en pizza ou revolcón.
As racións rondarán os dez euros, aínda que hai especialidades que poderán custar menos ou máis desta cantidade.
O polbo da pedra, un dos produto estrela de Xove, trabállase especialmente nos portos de Morás e de Portocelo; caracterízase por unha cor escura, con raxos máis longos e cabeza máis pequena.
ACTIVIDADES PARALELAS
A festa gastronómica contará con varias actividades paralelas. Do 2 ao 28 de abril poderase admirar a exposición ‘O polbo e o seu ecosistema‘, de 10.00 a 21.00 horas no salón de actos do consistorio xovense.
Os máis pequenos visitarán a mostra dentro dun obradoiro no que traballarán sobre este produto estrela de Xove, que se traballa especialmente nos portos de Morás e de Portocelo
Ademais, o xoves 18, ás 12.00 horas, a compañía Mircromina Teatro de Títeres recreará o espectáculo de monicreques ‘Ariadna‘. Creada por Ton Arenas en Mondoñedo, o grupo dirixe as súas actuacións ao público infantil e familiar, apelando ao humor, á intelixencia e á consciencia.
XOVE MIRANDO AO MAR
A celebración enmárcase dentro do proxecto ‘Construír o Futuro de Xove Mirando ao Mar’ financiado polo Galp Mariña-Ortegal, que organizará tamén este ano a Festa do Percebe, as Xornadas Gastronómicas e o Tapeo do Mar e as Visitas Guiadas en Embarcación á Illa de Ansarón.
Trátase un proxecto para a dinamización turística e socioeconómica do municipio impulsado desde o departamento de emprego e desenvolvemento local do Concello de Xove e na que colaboran tres entidades: administración local, Asociación A Medorra e ACIAM.