O Consello da Xunta de Galicia declarou a Festa das Cruces de Arante, en Ribadeo, de Interese Turístico Galego.

A celebración conmemora a vitoria dos veciños de sete parroquias de Ribadeo e Trabada –Ove, Covelas, Cedofeita e Arante, do municipio ribadense, e Sante, Vidal e Balboa, do trabadense- sobre as tropas de Napoleón durante a Guerra da Independencia.

“A antigüidade, singularidade, arranxo popular e valor cultural” da romaxe das Cruces valéronlle a distinción, segundo expuxo o presidente do Goberno galego, Alberto Núñez Feijóo.

A declaración vai aparellada a unha dotación económica para a celebración da festa, que alcanza os 3.000 euros.

BANDEO DO PENDÓN

No pasado mes de decembro, o Consello de Turismo de Galicia deu luz verde para a distinción da festa, que se celebra na ermida da Virxe das Virtudes. A veciñanza de cada unha das sete parroquias leva unha cruz e un pendón en peregrinaxe cara o templo.

No atrio ten lugar o momento máis vistoso da celebración, o bandeo do pendón. Un veciño, de xeonllos, dálle sete voltas de cada lado sen que a cruz que o coroa toque o chan.