A Xunta de Galicia vén de resolver a convocatoria de axudas do programa Aprol Rural 2019, que permitirá a contratación de 27 desempregados na Mariña Lucense cun investimento de máis de 353.000 euros.
A Consellería de Economía, Emprego e Industria financiará o 100% dos contratos que realicen as entidades locais do rural galego, que terán que estar vinculados á realización de tarefas relacionadas coa xestión do monte e a prevención de incendios nas faixas secundarias.
Así, os beneficiarios do programa poderán realizar tarefas de silvicultura, limpeza de montes, xestión da biomasa, valorización forestal ou a planificación preventiva.
Os traballadores e traballadoras que se contraten terán que estar inscritos no Servizo Público de Emprego de Galicia (SPEG) e a duración dos contratos será de nove meses a tempo completo.
Segundo expón o Goberno galego, o obxectivo do plan é proporcionar ás persoas sen traballo que habitan nos concellos rurais de Galicia -aqueles que non contan con ningunha zona densamente poboada a nivel parroquial- unha experiencia práctica e profesional necesarias para facilitar a súa inserción no mercado de traballo.
PRIORIDADE PARA OS MUNICIPIOS “EMPRENDEDORES”
A Xunta subliña que este ano eliminou os límites de contratación por concello e deu prioridade tanto aos municipios con maior superficie forestal como a aqueles fusionados ao protocolo de entidades locais emprendedoras.
Ademais, remarca o Executivo autonómico, aumentouse a contía media por traballador, que este ano se sitúa nos 13.176 euros, preto dun 20% máis que o exercicio anterior, atendendo deste xeito tamén a subida establecida para o salario mínimo interprofesional.
Na Mariña Lucense, Mondoñedo, Xove e O Vicedo serán os municipios cunha maior achega, que superará os 50.000 euros e permitiralles contratar a catro traballadores.
| A MARIÑA | Nº TRABALLADORES | SUBVENCIÓN (euros) |
| MONDOÑEDO | 4 | 52.088,40 |
| XOVE | 4 | 52.600,00 |
| O VICEDO | 4 | 51.247,80 |
| CERVO | 2 | 26.300,00 |
| BARREIROS | 2 | 25.089,66 |
| OUROL | 2 | 26.300,00 |
| PONTENOVA (A) | 2 | 26.300,00 |
| VALADOURO (O) | 2 | 28.091,34 |
| TRABADA | 1 | 13.022,10 |
| ALFOZ | 1 | 12.721,32 |
| RIBADEO | 1 | 13.150,00 |
| LOURENZÁ | 1 | 13.022,10 |
| BURELA | 1 | 13.150,00 |
| A MARIÑA LUCENSE | 27 | 353.082,72 |
MÁIS DE 500 CONTRATACIÓNS EN GALICIA
A nivel provincial, Aprol Rural 2019 destinará 1,5 millóns de euros para impulsar a contratación de 120 traballadores desempregados en 61 concellos rurais da provincia.
No conxunto de Galicia destínanse en total sete millóns de euros que posibilitarán o emprego de 531 galegos sen traballo en 268 concellos.
