Vinteoito artesáns do noroeste peninsular participarán o vindeiro domingo na décimo terceira Feira da Artesanía do Ferro de Riotorto.
O evento, que se celebrará nun recinto feiral cuberto, no que se poderá degustar polbo e outra comida tradicional, citará a ferreiros chegados de toda a provincia de Lugo, así como de Galicia e Navarra.
Con esta cita, Riotorto fai xustiza aos ferreiros, que axudaron a configurar este concello dende o punto de vista económico, social e mesmo físico, coa construción das ferrerías, os mazos e as moas que definiron a paisaxe.
PROGRAMA
O programa comezará ás 11.00 horas, coa apertura da feira e a exposición dos artesáns e produtos do campo. Ao longo do día, a música de Gaiteiros de Riotorto e a Charanga Louband amenizará a xornada.
Ás 11.15 horas empezarán as demostracións de oficios, cunha exhibición de pirogravado a cargo de Pirogravados do Norte, de Ortigueira; Roberto Figueira, de Rianxo, ofrecerá unha mostra de torneado de madeira; ademais, participarán Cestería Lito e Alfarería Aparicio, de Buño, e Eugenio Soto realizará tarefas de cristal tallado e decorado.
Ás 11.30 horas presentarase o libro de fotografías ‘A idade do ferro‘, publicado a partir da exposición do mesmo nome, obra de Xosé M. Salgado.
A actuación do coro de Riotorto, ás 12.00 horas, precederá a inauguración oficial da feira. As demostracións en vivo de artesanía do ferro comezarán ás 12.30.
Participarán os Ferreiros de Riotorto, o ferreiro austríaco Friedrich Brasmsteidl; Alberto Leis, de Santiago de Compostela; o Centro de Interpretación de la Forja (Forjas Brun de Navarra); o ferreiro Antonio do Corgo; artesáns da Fonsagrada e Forxa Chao, tamén da cidade compostelá.
Desde as 12.45 horas, os máis pequenos poderán coñecer como se traballa o fero da man de Brasmsteidl. O cómico vicedense Pepe Penabade fará un espectáculo itinerante, tanto ao mediodía como a primeira hora da tarde.
Ás 17.00 horas retomaranse as demostracións dos oficios e a partir das 19.00 horas haberá un espectáculo infantil para os máis pequenos no atrio da igrexa.
Concello e Asociación de Ferreiros organizan o evento. O alcalde de Riotorto, Clemente Iglesias, e o responsable da agrupación, José Manuel Cobo, participaron na presentación do evento, celebrada na Forxa de Lourín, onde se realizou unha demostración en vivo de artesanía do ferro.
🔥 Queres coñecer o milenario oficio dos ferreiros?. Achégate á 13ª @FeiradoFerro de #Riotorto o domingo 14 de abril🔨Demostracións en vivo, gastronomía, música e actividades para nenos. Tamén preséntase o libro ‘A Idade do Ferro’ 📝Programa 👉https://t.co/hyGvcIDMMu pic.twitter.com/uFQ7vpAhoZ
— Deputación de Lugo (@depulugo) 8 de abril de 2019
“MILLEIROS” DE VISITANTES
O presidente da Deputación, Darío Campos, e mailo delegado territorial da Xunta de Galicia, José Manuel Balseiro, asistiron á cita.
Campos destacou que a cita “atrae cada ano a milleiros de persoas ao municipio. Deste xeito, dinamiza a economía local e do conxunto da Mariña Lucense, así como pon en valor un oficio tradicional, a través de numerosas actividades e con demostracións en vivo”.
Á PROCURA DO RELEVO XERACIONAL
Balseiro, pola súa banda, remarcou que se trata dunha cita “singular”, que xira en torno a un oficio tradicional “en vías de extinción”. O delegado provincial da Xunta apuntou que “quizá se lle damos a esta actividade o valor que merece logremos que non se perda para sempre, que haxa en Riotorto un relevo xeracional que garanta que queden persoas que poidan seguir transmitindo esta tradición”.
