O candidato do Partido Popular (PP) á alcaldía de Ribadeo, Daniel Vega, reclama á Deputación de Lugo a mellora da estrada de Vilela, a LU-133.
O PP ribadense sinala que se trata “dunha reivindicación dos veciños”, e remarca que o grupo popular solicitou no pleno provincial do pasado 21 de marzo que se incremente o orzamento para investir nas estradas da rede viaria provincial.
Así, a petición dos populares de Ribadeo inclúe “o arranxo do pavimento, construción de beirarrúas, nova iluminación con renovación das luminarias e tamén dotala de papeleiras e de bancos”.
O candidato dos conservadores demanda ademais “a construción de dúas pasarelas exteriores na ponte, para que as persoas vaian camiñando por elas e así evitar algún risco de accidente”.
ACCESO AO CAMPO DE FÚTBOL
Vega explicou que a vía “ten moito tráfico rodado e peonil e pola que moitos xogadores da SD Ribadeo van adestrar ao campo de fútbol. Esperamos que a Deputación e o Concello non escollan a postura de perfil e que o goberno provincial invista na mellora desta estrada”, conclúe.
