EFE. Restaurar un galeón en Ribadeo ou buscar un fogar aos “perregrinos“, os cans que se quedan abandoados no Camiño de Santiago, son dúas iniciativas galegas que atoparon apoio grazas á rede social Facebook.
O Marineda City da Coruña é o punto de encontro este venres e sábado de Facebook Estación Central Galicia, a segunda parada que esta rede social fai en España, despois de Madrid, e na que os galegos que queiran compartir as súas vivencias poden achegarse a contalas.
O obxectivo é compilar historias e testemuñas inspiradores que ocorresen na vida real grazas á ferramenta. ‘La pescadería de mi barrio‘, en Vigo, é un negocio familiar que recibiu moitos clientes doutros lugares de España grazas á rede social.
Outra das experiencias “marabillosas”, asegurou o actor Tamar Novas, que foi o encargado de contar as historias galegas, é a investigación dun galeón en Ribadeo, que logrou interesar incluso ao National Geographic. “Paréceme algo épico”, subliñou o intérprete de ‘Fariña’, que considera que “que unha rede social poda axudar a poñer isto en valor é fascinante”.
MÁIS DE TRES MILLÓNS DE GRUPOS
En España hai máis de tres millóns de grupos activos, e do total Galicia representa unha parte importante. “Nestes tempos non se pode permanecer alleo ás redes sociais”, explicou Novas, que asegurou que hai que buscar unha utilidade humana a unha ferramenta, Facebook, “que pode mellorar as nosas vidas”.
