O ex xogador de baloncesto e comentarista deportivo coruñés Fernando Romay será o pregoeiro da trixésimo cuarta edición da Feira do Bonito, segundo anunciou o concelleiro de cultura de Burela, José Díaz. A cita gastronómica celebrarase o 4 de agosto.
Romay conta cunha carreira deportiva de excepción. O pivote foi medalla de prata nos Xogos Olímpicos de Los Ángeles 1984. “Pertenceu a unha xeración de deportistas que engrandeceron o baloncesto, que fixo que o gusto por este deporte aumentase”, expón Díaz. O pregoeiro sucede ao analista político de Xove Antón Losada e ao humorista ourensán Sergio Pazos.
PROMOCIÓN
Díaz asegurou que o Concello segue a traballar para conseguir a declaración de Festa de Interese Turístico Nacional para este evento culinario. Neste senso, considera que Romay, “que ten unha asociación gastronómica en Madrid, podería botar unha man na promoción do bonito”.
