A Xunta de Galicia investirá máis de 600.000 euros en melloras na residencia de maiores de Burela, no albergue xuvenil de Area, en Viveiro, e no campamento xuvenil da Devesa, en Ribadeo.
Segundo expón o Goberno galego, as actuacións forman parte do plan de obras da Consellería de Política Social, que ten como finalidade aumentar o confort e benestar das persoas usuarias dos centros públicos de servizos sociais, así como incrementar a eficiencia enerxética dos mesmos.
A actuación de maior contía corresponde á renovación da fachada, cuberta e habitacións do albergue xuvenil de Area, en Viveiro. Para esta obra o orzamento será de 350.000 euros.
Así mesmo, na mellora da envolvente da residencia de maiores de Burela investiranse 160.000 euros.
Por último, no tocante ao campamento xuvenil da Devesa, en Ribadeo, financiarase con 120.000 euros a substitución da fontanería da instalación.
OUTRAS ACTUACIÓNS NA PROVINCIA
En total serán sete os servizos dependentes da Consellería de Política Social na provincia de Lugo que se beneficiarán deste plan de obras.
Ademais dos citados anteriormente, tamén se acometerá unha reforma integral no Centro de Atención a Persoas con Discapacidade (CAPD) de Sarria; renovarase a residencia de maiores de Monforte de Lemos; realizarase unha reforma integral do Centro de Menores de Santo Anxo da Garda e poñerase en marcha un plan de renovación das instalación dos centros sociocomunitarios da provincia. O Goberno galego investirá nestas actuacións 2,5 millóns de euros.