A Feira do Bonito de Burela vén de ser declarada como Festa de Interese Turístico Nacional. Así o confirmou na mañá deste xoves o alcalde en funcións, Alfredo Llano.
O rexedor explicou que recibiu unha notificación da Secretaría de Estado de Turismo. O Goberno central indica que, tralo estudo da documentación presentada na solicitude, decidiu aprobar a declaración para a festa, que organiza a asociación cultural e recreativa Ledicia.
No pasado mes de maio, a Xunta de Galicia enviou o informe favorable para declaración ao Executivo central, que aproba agora a distinción.
“GRAN NOVA” PARA “POÑER A VILA NO MAPA”
Llano afirma que se trata dunha “gran nova“, xa que “houbo moito traballo detrás” e que a vila de Burela “merece este título honorífico, derivado da importancia que ten para nós a pesca do túnido, e o que representou sempre para a sociedade, a economía e a cultura pesqueira do noso municipio”.
O rexedor espera que a distinción “abra unha nova etapa” e “axude a poñer a Burela no mapa“, ao “facilitar que se nos coñeza e se nos visite”.
REQUISITOS
O edil de cultura en funcións, José Díaz, mostrouse “emocionado” e “orgulloso” despois de “máis de tres anos de traballo” para conseguir a distinción, “con todas as cousas que se piden” para outorgala.
O concelleiro resaltou o esforzo do goberno local por apoiar á asociación organizadora “con actividades paralelas, coa busca de pregoeiros que tiveran peso a nivel nacional, e coa realización de 21 entrevistas a nivel estatal que non fosen publicitarias senón de interese social”.
TERCEIRA FESTA DA PROVINCIA EN ACADALO
Díaz lembrou que só Arde Lucus e San Froilán contan na provincia de Lugo con este recoñecemento.
APARICIÓN EN GUÍAS INTERNACIONAIS
O edil remarcou, entre as consecuencias que terá a distinción, a promoción que ofrecerá. A feira aparecerá “en guías turísticas internacionais. Persoas de calquera país de Europa que nos visiten poderá saber da Feira do Bonito de Burela”, subliñou.
“BURELA ESCRÍBESE CON B DE BONITO”
A asociación cultural Ledicia impulsa a festa gastronómica desde as súas orixes, a mediados dos anos oitenta. O que comezou “como unha merenda de amigos asociada a unha xornada cultural de teatro“, segundo explica a presidenta da agrupación, Rocío Rivera Seara, acabou por cobrar peso e representar dalgún xeito a identidade de Burela.
“Burela escríbese con B de bonito”, salienta Rivera, que cre que a distinción será importante “para que nos coñezan e tamén para lembrar de onde vimos, pois esta vila naceu do mar“.
Malia que a maioría da poboación do municipio traballa xa noutros sectores e a frota burelá do bonito mingua, a relación entre o crecemento entre a vila de Burela e a industria da pesca do túnido é indiscutible. “Moitísima xente viviu deste peixe”, expón a presidenta do colectivo.
Rivera Seara felicita ao edil de cultura “pola súa loita por esta distinción”, que suporá “máis información” para quenes non coñezan a feira, que ten esta intención última, a de mostrar. “A Feira do Bonito quere ensinar como se pesca este peixe, a calidade que ten e que se pode facer con el na cociña, máis alá de consumilo en conserva”, precisa.
A TRIXÉSIMO QUINTA EDICIÓN, O 3 DE AGOSTO
A degustación gastronómica, que cumprirá 35 anos o 3 de agosto, require do esforzo desinteresado de “arredor de 150 persoas, que traballan en unidade e a gusto durante semanas para ofrecerlle á xente de fóra un pouco do que somos”.
