O voceiro da Fronte popular de liberación de Palestina para Europa, Fayez Badawi, impartirá unha conferencia sobre a situación social e política no Oriente Medio en Foz o vindeiro martes.

A asociación cultural A Pomba do Arco, que promove a palestra, adianta que o acto “representa unha oportunidade única na Mariña para poder coñecer de primeira man a grave situación humanitaria na que se atopan os cidadáns palestinas residentes nos territorios ocupados de Gaza“.

Nacido en 1955 no campo de refuxiados de Tal az-zatar, en Beirut Leste, Fayez Badawi incorporouse á resistencia palestina aos 12 anos, participando en 1982 na batalla de Beirut, que obrigou aos militantes palestinos a abandonar as súas posicións no Líbano camiño do exilio cara outros países árabes.

INESTABILIDADE E GUERRA EN ORIENTE MEDIO

O político palestino botará tamén unha ollada á situación noutros países de Oriente Medio coma Siria, onde residiu durante épocas; Irán, diana dunha campaña de máxima presión económica por parte de Estados Unidos; ou Iemen, escenario dun conflito armado recrudecido pola intervención dunha coalición de países árabes e occidentais liderados por Arabia Saudita.

A conferencia será na Casa da Cultura Poeta Manuel María de Foz ás 20.30 horas.