O Concello de Barreiros emitiu un bando para lembrar ás persoas propietarias de fincas próximas a vivendas ou núcleos a obriga de limpar as parcelas de maleza, lixo ou outros elementos que xeren risco de incendio ou insalubridade.

O goberno local outorga aos titulares dos terreos un prazo de 15 días para realizar as mencionadas tarefas e advirte de que se non se adecentan as fincas no tempo estipulado, o Concello “executará o procedemento legalmente previsto”.

Así, precisa o executivo municipal, a lexislación aplicable contempla medidas coercitivas, como multas de 1.000 a 10.000 euros ou execucións subsidiarias.

“A realidade é que hai moitas parcelas, mesmo no casco urbán, que están en situación de abandono, sen que se realicen as tarefas de mantemento básico, co cal xeran un perigo de incendio, de insalubridade e tamén unha mala imaxe do municipio”, expón a alcaldesa, a nacionalista Ana Ermida. 

Ermida explica que se trata “dunha medida que leva anos contemplada na lexislación galega e que se debe aplicar igualitariamente para tratar de que Barreiros amose unha imaxe o máis limpa e ordenada posible”.

“CUESTIÓN DE SEGURIDADE”

Incide ademais de que “é una cuestión de seguridade, xa que as fincas sen limpar son un perigo a efectos de incendios ou mesmo de animais que poidan vivir nelas e chegar a vivendas próximas”.

Desde o goberno local manifestan que a intención do bando é tratar de que a xente “execute por si mesma estas limpezas”, sen necesidade de ter que avanzar no procedemento.

Aínda así, advirten que “a limpeza pública e a seguridade de inmobles e persoas son obxectivos fundamentais deste goberno municipal, polo que executaremos as medidas que sexan necesarias para a consecución dun concello limpo e en condicións de salubridade”.