O portavoz do PSOE de Cervo, Francisco Mon, criticou este venres a “pésima xestión” do alcalde do Partido Popular (PP), Alfonso Villares, “tamén” no ámbito económico, xa que no ano 2018, “co afán de sacar rédito electoral a actuacións que non fixo nos últimos oito anos, incumpriuse a regra de gasto por unhas actuacións que tiveron como protagonistas o baixo control de execución dos orzamentos, e o despilfarro e a improvisación”.

Os socialistas citan como exemplos “obras que non se axustaron aos proxectos definidos e incorporacións masivas de persoal”. Os socialistas expresáronse deste xeito despois da celebración, o pasado venres, do pleno ordinario, no que se aprobou cos votos a favor do PP, o Plan Económico Financeiro 2019-2020, o instrumento que establece a Lei de Estabilidad Presupuestaria para as administracións que, como Cervo, incumpran a regla de gasto.

Así, apuntaron que, segundo establece o Plan aprobado, durante este ano e o que
vén o Concello practicamente non acometerá investimento algún, levando a cabo
soamente as que ten en execución do exercicio pasado de 2018. “Si os orzamentos
eran unha mera entelequia, agora directamente son papel mollado”, sostiveron.

Por outra parte, o PSdeG-PSOE cervense lamenta o “burdo intento” do Partido Popular de
“minimizar” a importancia deste “suspenso rotundo” na xestión do equipo de Goberno,
que lle impoñen “as normas creadas polos seus propios compañeiros do PP cando
estaban no Ministerio de Facenda”.

Por último, os socialistas consideran que os cervenses “teñen que saber” que o
incumprimento “terá un impacto”, queiran ou non, sobre a calidade dos servizos que van a recibir. Así, prognostican, “haberá actuacións que se verán comprometidas ou retrasadas, posibles revisións de contratos a baixa, e por último, pode afectar seriamente os orzamentos do 2019 e anos seguintes porque se reduce a base do gasto computable”.