O alcalde de Cervo, Alfonso Villares, respondeu este luns ás críticas do grupo municipal do PSdeG-PSOE, que lle afeou ao executivo local o incumprimento da regra de gasto en ano preelectoral.

Os socialistas advertiron que a aprobación dun Plan Económico Financeiro para 2019 e 2020, aprobado no pleno do pasado venres, suporá unha conxelación dos investimentos nos vindeiros orzamentos.

O rexedor popular sinalou que as contas do concello “están totalmente saneadas e con superavit” polo que non requerirían do control orzamentario que supón a aplicación da regra de gasto, imposta ás administracións locais a través da Ley Orgánica de Estabilidad Presupuestaria y Sostenibilidad Financiera de las Administraciones Públicas, aprobada en 2012 polo goberno de Mariano Rajoy.

DEMANDA DO MUNICIPALISMO

Villares apuntou que “a eliminación da regra de gasto é unha vella demanda do municipalismo” e lembrou o respaldo do PSOE a un “acordo” adoptado pola  Federación Galega de Municipios e Provincias (Fegamp) para pedir a flexibilización da norma estatal, que restrinxe a capacidade dos concellos para investir o seu superávit.

O rexedor cervense engadiu que “institucións como a Deputación Provincial de Lugo tamén incumpren á regra do gasto” e dixo interpretar as consideracións dos socialistas locais como unha “autocrítica”.

“INCUMPRIMENTO CONXUNTURAL”

O popular mininizou o impacto do plan financeiro aprobado o pasado venres e concluíu que “o incumprimento ten un carácter meramente conxuntural”.