O alcalde de Burela, o socialista Alfredo Llano, esixiu este xoves “unha rectificación” ao Bloque Nacionalista Galego (BNG), que atribuíu ao Concello que a praia de Ril “estea parcialmente descuberta” trala baixa definitiva dun socorrista.

Llano acusou ao BNG de “mala intencionalidade” ao Bloque ao afirmar que o goberno local rexeitou aspirantes a socorristas. “Hai que ter moito valor para dicir isto ou moita desesperación por chamar a atención”, asegurou o rexedor en funcións sobre o voceiro dos nacionalistas, Mario Pillado.

O alcalde explicou que “houbo un caso dunha persoa que chegou tarde e non puido entrar en prazo, polo tanto se non é así non cumpre as condicións que se determinan para ser socorrista no noso concello”. Así, Llano pregunta a Pillado se quere que o executivo municipal “faga ilegalidades. Que o diga textualmente, que pasa de toda a regulamentación”, agregou.

Ante as acusacións de desinterese por parte da formación frontista, Llano salientou que “estivemos preocupados de buscar xente, de forma case persoal, que quixera participar no proceso de selección para ser socorrista, recorremos ao boca a boca”.

CURSOS FORMATIVOS

O rexedor burelao reiterou que tanto o Concello como a Mancomunidade de Municipios da Mariña Lucense están a “dar pasos” para organizar cursos formativos do título homologado de socorrista. Iso é o que hai que ir facendo e non poñendo trabas nin confundindo á xente”, rematou.

ALUSIÓN A BARREIROS

O rexedor instou a Pilllado a que “traballe” e mesmo aludiu aos problemas doutro Concello, neste caso de goberno nacionalista, o de Barreiros, co servizo de socorrismo, para cuestionar que o BNG “sexa agora o punto de referencia de facer ben as cousas”.