A CIG Saúde A Mariña denunciou este mércores que no centro de saúde de Viveiro estase a rexistrar este verán “unha temperatura media de entre 29 e 31º en determinadas consultas”, situación que “incumpre a normativa legal vixente sobre as máximas autorizadas non só nun centro asistencial senón en calquera lugar de traballo”.
O sindicato nacionalista explica que o máximo estimado para o risco de tensión térmica é de 27 graos centígrados. Segundo a normativa legal vixente, expón a CIG, “a temperatura en centros onde se realicen traballos sedentarios propios de oficinas e tarefas similares deberá estar comprendida entre 17 e 27º C e naqueles onde se fagan traballos lixeiros entre os 14 e 25º C”.
Deste xeito, a central sostén que a “excesiva calor” está “a afectar a traballadores, pacientes e usuarios” e lembra que existe “un risco potencial de desmaio por estas altas temperaturas”.
A XUNTA, “CONSCIENTE”
A situación non é nova, salienta o sindicato, dado que “os profesionais levan tempo demandando unha solución para unha situación que se repite todos os veráns”. Así, asegura que a Estrutura Organizativa de Xestión Integrada (EOXI) de Lugo-Cervo-Monforte é coñecedora deste problema polas canles oficiais”.
Neste sentido, a Xerencia de Atención Primaria “dotou a este centro dunha serie de ventiladores que non resolveron o problema e a calor é insoportable”, precisan.
AMEAZAN CON DENUNCIAR
Desde a CIG esixen ao Servizo Galego de Saúde (Sergas) que cumpra a lexislación vixente en materia de prevención de riscos laborais e adopte as medidas correctoras oportunas para solucionar esta situación. De non ser así, “verémonos na obriga de presentar denuncia ante Inspección de Traballo”, conclúen.
