O Concello de Cervo anunciou este venres que a obra da nova vía ubicada entre a Avenida Bellavista e a Avenida da Veiga “está practicamente rematada” e poderá “estar operativa” no prazo dun mes.
O alcalde de Cervo, o popular Alfonso Villares, acompañado da tenente de alcalde, Dolores García Caramés, e do edil de Protección Civil, Alfredo Fernández, achegouse ata a zona de Galdín para supervisar as obras da nova estrada, “na que se están a ultimar detalles para poder abrila, de xeito inminente, ao tráfico rodado e peonil”.
Villares explicou que nestes intres falta o pintado, os acabados e a construción das dúas glorietas proxectadas -unha fronte ao centro de saúde e outra na zona do colexio– que servirán de enlace coas vías que son titularidade da Deputación, e que tamén contribuirán “a reducir a velocidade nestes tramos, reforzando así a súa seguridade”.
A nova rúa ten unha lonxitude de 350 metros e unha anchura de doce que favorecerá o dobre sentido da circulación, ademais tamén disporá dunha zona importante de aparcadoiros e de beirarrúas a ámbolos dous lados da calzada.
INVESTIMENTO DE MÁIS DE 600.000 EUROS
O investimento da Xunta de Galicia supera os 600.000 euros, unha achega que o alcalde agradeceu, xa que “nos permitiu executar unha arteria de comunicación funcional, que dará moito servizo aos vehículos que circulen por San Cibrao”, esgrimiu.
O rexedor argumentou que se trata dunha infraestrutura “fundamental” para San Cibrao “que nos permitirá aliviar o tráfico do centro da vila ao tempo que tamén pode ser unha solución provisional para os vehículos pesados do polígono de Cuíña”.
