Un grupo de axentes de viaxes do operador turístico ruso Vremia Tours teñen esta semana a oportunidade de coñecer parte da oferta e os recursos turísticos de Galicia, entre eles A Mariña Lucense.
A viaxe está organizada pola Consellería de Cultura e Turismo da Xunta de Galicia para que o touroperador promova nos seus países de orixe os valores turísticos galegos.
Son preto de 20 persoas as que participarán nesta visita cun dos operadores máis importantes do mercado ruso. O percorrido permitirá o coñecemento da meirande parte do litoral galego, así como a enogastronomía e bens que xa están declarados Patrimonio Mundial ou que aspiran a selo, con paseos en catamarán e visitas a varios mosteiros da Ribeira Sacra ou un percorrido polas illas Cíes en Vigo.
Esta viaxe de familiarización organizada en colaboración coa Oficina Española de Turismo en Moscova deu comezo o pasado venres con visita á cidade da Coruña, con percorrido panorámico por un dos paseos marítimos máis largos de Europa e visita á Torre de Hércules. Os participantes visitaron o sábado Santiago de Compostela onde tamén puideron coñecer os Entroidos galegos, un dos recursos etnográficos máis diferenciadores da comunidade.
PARADA NAS CATEDRAIS
Nos vindeiros días, o grupo de turoperadores coñecerán a cidade de Lugo co seu monumento característico, a muralla; o luns desprazaranse ata a Mariña lucense para coñecer a praia das Catedrais ou concellos como Ribadeo, Viveiro ou Cervo. Na localidade viveirense, o Concello disporá unha visita guiada a lugares emblemáticos como o Souto da Retorta, onde os axentes serán recibidos por unha formación de música tradicional galega.
Tamén se pretende promover o turismo de natureza entre o mercado ruso, polo que a viaxe incluirá unha visita guiada ao Parque Natural das Fragas do Eume.
O Grove, a Illa da Toxa, Combarro, Allariz, Pontevedra ou Ourense, onde se incluirá unha xornada de descanso termal, serán outras das paradas programadas.
