O Ribadeo Indiano congregou a 50.000 persoas nos tres días de festa e deixou un impacto económico no municipio de tres millóns de euros. Son os datos que deixaron as primeiras estimacións da Asociación de Comerciantes, Industriais, Servizos e Autonómos (Acisa) e mailo Concello, organizadores do evento.

A partir das primeiras estimacións sobre a ocupación hostaleira, a agrupación de comerciantes fala dun incremento de “10.000 persoas con respecto ao ano pasado” e califica a cita de “éxito rotundo”. O presidente da Acisa, Francisco Iriarte, asegura que o Ribadeo Indiano converteuse na “festa máis importante da localidade”.

OS MUNICIPIOS LIMÍTROFES, “BENEFICIADOS”

Ademais, Iriarte resalta que o impacto económico do evento xa beneficia a outros municipios limítrofes. “Tiñamos tanta xente que era imposible comer en Ribadeo e afectou a Vegadeo, Tapia, Foz ou Barreiros”, precisa.

O presidente do colectivo de empresarios ribadense afirma que, de cara á vindeira edición, a festa ampliará a súa oferta, “pero sobre todo no lúdico e no cultural, porque o Ribadeo Indiano é cultura”.

NO 2019, DO 12 AO 14 DE XULLO

A edil de turismo ribadense, Ana Martínez, sostén que o Concello ten “unha satisfacción plena pola asistencia e a participación nas actividades”. A concelleira anunciou ademais que a vindeira edición do Ribadeo Indiano será na segunda semana de xullo, do día 12 ao 14.