A presenza da prestixiosa cociñeira Lucía Freitas, que conta cunha Estrela Michelín no seu restaurante ‘A Tafona‘, de Santiago de Compostela, será un dos atractivos da segunda edición das Xornadas Gastronómicas e o Tapeo do Mar, que se celebrarán os días 17 e 18 de outubro en Xove.
O evento, impulsado polo Concello de Xove e a ACIAM, celebrarase no pavillón de deportes e nos locais de hostalería do municipio. Se na primeira edición participou o finalista de Top Chef Miguel Cobo, neste 2019 será Freitas a encargada de realizar unha demostración de cociña, o xoves ás 20.30 horas no polideportivo.
SHOWCOOKING DE ENTRADA GRATUÍTA
Nun escenario que o Concello instalará coa colaboración de Mármoles A Mariña e Establecimientos Rey, Freitas cociñará en directo e preparará diferentes elaboracións con produto local e frescos do mar, explicando a todas as persoas que asistan os conceptos e valores que hai detrás de cada un dos empratados. A entrada a este singular espectáculo será de balde ata completar aforo.
O VENRES, TAPEO
Ademais, durante a xornada, a cociñeira asesorará aos hostaleiros e hostaleiras en materia de elaboracións ou empratados co obxectivo de que o venres 18 poñan en práctica os coñecementos adquiridos para realizar un tapeo especial no que os produtos do mar serán os protagonistas indiscutibles.
Un xurado formado por persoas de diferentes eidos avaliará as creacións e outorgará un recoñecemento ao local de hostalería que ofreza a mellor tapa, tanto en presentación como en sabor. A cita comezará ás 20.00 horas, coa participación de sete establecementos: Onde Sempre, O Refugio, A Fuga, O Cabaliño do Mar, A Roda, O Pepe e Centro Cívico.
O alcalde de Xove, o popular Demetrio Salgueiro, asegurou que “a experiencia dunha chef con Estrela Michelín” como Freitas permitirá “dar un salto de calidade” á hostelería de Xove.
CARREIRA CHEA DE PREMIOS
Freitas (Santiago de Compostela, 1982), formouse na Escola Superior de Hostalaría de Artxanda en Bilbao, ademais de traballar no Celler de Can Roca, no Bohío e en Mugaritgz.
No 2009 abreu A Tafona, que naceu como unha casa de comidas na que pretendía abrir a todo o público unha cociña máis elaborada. Gañou ata cinco veces o concurso de tapas da cidade. No 2016 obtivo o segundo posto no concurso nacional ‘Cociñeiro do Ano’ e no 2017 acadou a súa primeira Estrela Michelín.
Unha semana máis tarde, abre Lume tamén en Santiago de Compostela, un novo concepto de barra gastronómica na que cociñar baixo a premisa ‘slow food a lume de carozo’.
XOVE MIRANDO AO MAR
As xornadas gastronómicas forman parte do proxecto Construír o Futuro de Xove Mirando ao Mar, financiado polo Grupo de Acción Costeira (Galp) Mariña Ortegal e impulsado desde o departamento de emprego do Concello de Xove.
Este programa ten como principais obxectivos dinamizar turística, social e economicamente Xove e a zona da Mariña-Ortegal, aumentar o valor engadido e o consumo dos produtos desta área, e dotar ao sector hostaleiro das ferramentas necesarias para desenvolver os elementos diferenciadores que lle permita ser máis competitivo.
