Os socorristas de Foz e Barreiros traballaron na tarde do venres para salvar a un golfiño común de varar na praia focega de Llas, primeiro, e na barreirense de Altar, despois.
En Llas, animal achegouse demasiado á beira e estivo a piques de quedar en seco. Os bañistas avisaron ao 112 e os socorristas, a partir das instruccións dos técnicos da Coordinadora Para o Estudo dos Mamíferos Mariños (Cemma), introduciron ao golfiño de novo no mar. Ocorreu sobre as dúas e media da tarde.
Unha hora despois, o cetáceo tentou varar de novo en Altar. Os socorristas metérono na auga e acompañárono ata mar aberto. A tarefa presentou dificultades, posto que tardou en saír da ría de Foz. Así, as embarcacións dos socorristas de Barreiros e Foz desprazáronse a máis de 1.500 metros da costa.
ERRO DE NAVEGACIÓN
Os técnicos do Cemma cren que o comportamento errático do golfiño puido deberse a un erro de navegación por causa da marea baixa, xa que non presentaba feridas nin síntomas de desnutrición.
