A elección da raíña ou rei do Entroido de Foz farase nun acto público no que participarán os membros do xurado e tamén poderá votar o público asistente. A asociación O Noso Foz, que se encarga da organización, e a concellería de cultura impulsarán unha nova forma de elixir a quen será coroado na popular cea-baile.
Segundo expuxo o Concello a través dun comunicado, no acto público que se convocará para elixir á raíña ou rei do Entroido de Foz farase a presentación das persoas candidatas, que deberán realizar probas propostas polo xurado.
Na elección da persoa que suceda a Sabela Pico Lombán, coroada na pasada edición, pesará un 60% o voto do xurado e un 40% o do público.
AS INSCRICIÓNS, ATA O 8 DE NOVEMBRO
O prazo de presentación de candidaturas está aberto ata o día 8 de novembro deste ano. Os requisitos son ter máis de 18 anos e estar empadroado no municipio focego. A data e o lugar do acto público para a elección están por determinar. Os interesados poden obter máis información no teléfono 982.14.00.27.
