A asociación cultural A Pomba do Arco, no marco dos actos de homenaxe ao finado Xoán Carlos González Basanta, que se celebraran coincidindo co trinta aniversario da entidade, editará un libro póstumo da súa autoría.
O volume titulado, ‘Charametas da memoria‘, en referencia a uns relatos inacabados que escribiu nos seus últimos anos, recolle unha serie de textos e discursos, unha parte deles inéditos, outros recollidos en diversas publicacións e unha parte deles coñecidos pero non impresos.
Segundo expón A Pomba do Arco, González Basanta “caracterizouse polo seu gusto literario, pola súa finura á hora de escribir, pola súa vontade de estilo e por ter tocados diferentes xéneros, como a poesía, a narrativa, o ensaio e a oratoria, onde nos deixou pezas de imborrábel recordo para os focegos”.
O libro, impulsado pola Pomba do Arco, responde ao obxectivo de axudar a coñecer de primeira man as preocupacións e motivacións de González Basanta pero tamén “de comprender a razón de ser dunha entidade empeñada en facer cultura galega en Foz”.
Os textos de Basanta incluídos no volume recollen unha parte da súa obra de ficción, concretamente, unha serie de poemas publicadas no fanzine O Cadaleito baixo o pseudónimo de Luís de Fonseca e un bosquexo de libro de relatos que non lle deu tempo a rematar.
Ao tempo, achega un pregón pronunciado con motivo das festas do Carme de Foz e unha intervención pública realizada nun acto de homenaxe ás vítimas do franquismo, como exemplos dunha oratoria que emocionou e a moitos focegos. Xa por último, inclúense unha serie de textos previstos como limiares para diversas publicacións, a maioría deles coñecidos e un aínda inédito.
ACTO DE HOMENAXE O DÍA 26
‘Charametas da memoria’ presentarase coincidindo cos actos da homenaxe ao que fora presidente da Pomba do Arco e concelleiro do BNG focego, a celebrar o sábado 26 de outubro. Nesa xornada haberá un espectáculo teatral e musical e unha cea posterior. Podes consultar o programa completo aquí. Anotan para a cea e o concerto no teléfono 608.55.50.10.
