A CIG denuncia que o Servizo Galego de Saúde (Sergas) conta cun só médico para cubrir tres baixas de médicos de familia no centro de saúde de Viveiro. “Un dos facultativos atópase de vacacións até o 1 de agosto, outro galeno xubilouse e a outra profesional tivo un nomeamento político”, lembra.
O sindicato nacionalista afirma que, durante a semana do 2 ao 8 de xullo, dos sete médicos de familia da quenda de mañá só quedaron catro, ao non cubrir o Sergas ningún dos días as tres ausencias actuais.
A CIG asegura que o Sergas tomou a decisión de non substituír ao persoal cando está de vacacións, por xubilación ou por outros motivos, o que, sostén, está a ter como consecuencia “a redución de servizos e unha sobrecarga asistencial nunha vila que ve aumentada a poboación durante o período estival polo turismo. Estase a producir unha masificación das consultas, con cupos profesionais por enriba do establecido legalmente”, advirten.
O colectivo de traballadores esixe a cobertura das ausencias e resalta o papel “básico” da atención primaria “para garantir un servizo de calidade e proximidade”.
