A segunda edición da mostra de teatro feito por persoas con diversidade funcional, Superarte, rematou o pasado domingo en Viveiro cun éxito de asistencia e participación.
Actividades como un encontro entre o ‘youtuber’ xordo Iván Vázquez, de Familia Vázquez TV, co alumnado viveirense; a posta en escena da primeira obra de teatro interpretada en lingua de signos en Viveiro, a cargo da compañía semiprofesional ‘El Grito‘; ou un concerto inclusivo no que persoas xordas poideron sentir a música con mochilas vibratorias cedidas polo Concello de Nigrán, foron algunhas das actividades programadas.
A empresa Entresignos, de tradución a linguaxe de signos, permitiu que todas as actividades contaran con intérpretes.
INCLUSIÓN
“A sensación da consellería de cultura é que se deu un paso adiante cunha repercusión en toda Galicia; de feito, diversas asociacións de diversidade funcional puxéronse xa en contacto co Concello para interesarse e ofrecer a súa axuda de cara á organización do certame en 2020”, asegura a alcaldesa de Viveiro, María Loureiro.
Segundo Loureiro, a iniciativa consolida a Viveiro como municipio “inclusivo e integrador. Desde as administracións públicas temos que facer o posible para que as persoas con diversidade funcional convivan na sociedade con todos os seus dereitos e este certame pretende concienciar e sensibilizar á sociedade en xeral deste obxectivo, temos que comprender que é un traballo de todos”, concluíu a rexedora.