O Concello de Burela anunciou este xoves que o Lar Gallego de Sevilla dedicará ao municipio a súa caseta na Feria de Abril, que se celebrará do 26 dese mes ao 2 de maio de 2020. O goberno local fará promoción turística da vila no evento, segundo avanzou o concelleiro de turismo en funcións, Ramiro Fernández Rey.
O edil precisou que se trata “dunha invitación que nos fai o Lar Gallego de Sevilla para dedicar ao concello de Burela esta edición do evento no que se refire á súa caseta, que vai estar decorada con fotos e pinturas de Burela”.
O Lar Gallego de Sevilla, segundo explicou o goberno local burelao, é unha casa galega con máis de 800 socios, que conta cunha das casetas máis grandes das máis de un milleiro que congrega a Feira de Abril. “Por alí pasa moitísima xente, polo que é unha oportunidade única de promocionar Burela”, argumentou o concelleiro.
Fernández Rey considera que o convite ofrece “unha maneira estupenda de promocionar Burela e desde logo estamos agradecidos ao Lar Gallego por elixirnos para participar nestes actos. Imos estar alí con presenza institucional por suposto promocionando o municipio dentro das nosas posibilidades”, expuxo.
STAND NUN ENCONTRO DE CASAS REXIONAIS E PROVINCIAIS
Máis tarde, en outubro e tamén da man do Lar Gallego, Burela participará nun encontro de casas rexionais e provinciais que se celebra en Sevilla, ligado á Feira de Abril. “Imos ter alí un stand no que imos poder facer unha promoción turística de Burela e ademais teremos a posibilidade de que os nosos produtos sexan degustados en Sevilla”, indicou o edil.
