A escritora, ensaísta e crítica literaria Laura Freixas ofrecerá o vindeiro xoves, 7 de outubro, unha conferencia (20.00 horas, hotel O Cabazo) en Ribadeo. Organiza a actividade o Observatorio da Mariña Pola Igualdade.

Freixas é fundadora, no 1987, da colección literaria ‘El espejo de tinta‘. Destaca como escritora de novelas e ensaios, así como crítica literaria e articulista en
diversos medios.

Na súa faceta como investigadora e promotora da literatura escrita por mulleres, no ano 2009 funda Clásicas e Modernas, asociación dedicada ao apoio das políticas de xénero na cultura e desde o ano 2014 coordina o ciclo de conferencias ‘Ni ellas musas ni ellos genios‘. Tamén escribe en La Vanguardia.

Acaba de presentar o seu libro ‘A mi no me iba a pasar‘, unha autobiografía con perspectiva de xénero na que repasa unha época da súa vida cun matrimonio que remata por non ser o que imaxinara e onde debe afrontar numerosas dificultades no mundo laboral, tanto como editora como escritora.

REFLEXIÓN SOBRE O PATRIARCADO

O Observatorio convida a todas as persoas interesadas a acudir a esta charla, “que nos
ofrece unha oportunidade magnífica para reflexionar sobre o patriarcado e capitalismo, a aparencia de igualdade entre as parellas e as propias contradicións persoais”, expón o colectivo.