Un total de 13 locais de hostalería de Mondoñedo promocionarán a vindeira fin de semana a faba verdina cunha ruta de tapas na que a leguminosa será a protagonista.
Trátase dunha iniciativa do Concello mindoniense, en colaboración coa Asociación de Produtores de Faba Verdina, a fin de estimular o comercio e promocionar esta variedade local.
Valeco, Amencer, Padornelo, Pasatempo, Rincón, Porriño, A Vinoteca de Segundo, Bar Castro, A Tasca, O Petisco, Taberna Galiana, A Bodeguiña e O Palique son os establecementos que participarán na ruta.
Cada negocio recibirá cinco quilos de fabas, achegados polo Concello e a agrupación de produtores. O colectivo está integrado por tres produtores, doutros tantos municipios, coa súa sede en Mondoñedo.
PRODUTO CON “AMPLAS POSIBILIDADES”
O secretario da asociación, Alfonso Cartoy, sinala que con esta iniciativa perséguense varios obxectivos. Por un lado, “que os hostaleiros comproben as posibilidades gastronómicas que ofrece este tipo de faba, así como o seu rendemento. Por outro, que o público en xeral deguste un produto polivalente á hora de preparalo”, indica.