O Centro de Información ás Mulleres (CIM), dependente do Concello de Mondoñedo, vén de poñer en marcha a actuación ‘O recuncho da igualdade‘, unha selección bibliográfica de libros dirixidos ao público infantil e xuvenil coa prevención do sexismo como temática principal.
Esta actividade está financiada pola Xunta de Galicia, a través da Secretaría Xeral de Igualdade, como unha das medidas recollidas no Pacto de Estado contra a violencia de xénero.
Actualmente compoñen este recuncho un total de 37 títulos que estarán a disposición de todas as persoas interesadas nas dependencias do CIM.
A EDUCACIÓN, “A BASE”
Ademais, como parte desta iniciativa, foron entregados nos centros educativos do concello o mesmo número de obras, repartidas en función das idades do alumnado, e que veñen a aumentar os fondos bibliográficos que sobre este tema teñen na escola infantil, no CEIP Álvaro Cunqueiro Mora e IES San Rosendo, complementando así as labores que levan a cabo na promoción da igualdade, toda vez que a educación é a súa base.
