Barreiros pide á Xunta que corrixa unha guía de surf que sitúa Oliñas “entre Ribadeo e Foz”

O Concello considera "pouco acertado" non mencionar o municipio no que está situado o areal, no canto dun "lugar indeterminado"

Oliñas. TURISMO DE GALICIA

A alcaldesa de Barreiros, a nacionalista Ana Ermida, anunciou este martes que remitiu unha carta á directora xeral de turismo da Xunta de Galicia trasladándolle o “disgusto” porque o material editado no proxecto ‘Galicia Surfing’ obvia que unha das praias incluídas no top 16, Oliñas, se atopa no municipio, mencionándoa como “un gran areal entre Ribadeo e Foz”.

A rexedora asegura na súa misiva que “como representante do Concello de Barreiros síntome honrada de ter un espazo no material editado sobre o mencionado programa, nomeadamente, incluíndo a praia de Oliñas como unha das destacadas a efectos da práctica do surf”. ‘Galicia Surfing’, que conta cunha app para teléfonos móbiles, identifica as mellores praias para desfrutar deste deporte e deseña viaxes para coñecer outros atractivos turísticos dos municipios.

Con todo, Ermida amosa o seu malestar co Goberno autonómico “por obviar a ubicación da praia de Oliñas en Barreiros”, indica.

Ermida asegura que o goberno municipal é “consciente de que a situación de Barreiros entre dous polos de atracción turística como son os municipios de Foz e Ribadeo é unha oportunidade”, pero consideran “pouco acertado non ter sequera mencionado o concello que acolle na súa xeografía dito areal”.

NECESIDADE DE PROMOCIÓN

A alcaldesa fai fincapé en que “o feito de ser un concello de menor entidade poboacional que os seus veciños e con un menor impulso turístico neste momento xa dificulta de por si a propia promoción, polo que non podemos desde as institucións deixar pasar as oportunidades de situarnos no mapa dos diferentes recursos turísticos para abrir un oco na recepción de visitantes”.

A comunicación enviada polo executivo municipal remata con unha solicitude expresa á Xunta para que corrixa o material editado no proxecto Galicia Surfing, facendo constar que a praia de Oliñas se atopa en Barreiros e non nun punto indeterminado entre Ribadeo e Foz, e trasladando a consideración de que “a promoción local inserida na promoción colectiva é o mellor xeito de aproveitar os nosos recursos e contribuír ao desenvolvemento económico dos nosos municipios”.

RESPOSTAR

Please enter your comment!
Please enter your name here