A Xunta de Galicia vén de conceder a seis centros educativos galegos -entre eles o IES Monte Castelo de Burela– os premios da terceira edición do certame Desafíos STEM: programación, robótica e impresión 3D, que ten como obxectivo recoñecer o traballo realizado nos centros cos materiais e a formación recibida nestes ámbitos.
A convocatoria da Consellería de Educación, Universidade e Formación Profesional establece dúas categorías, con tres desafíos cada unha delas (Desafío Robots, Desafío Programación ou Desafío Impresión 3D). O premio ascende a 2.000 euros para o equipo docente dos centros gañadores nos diferentes desafíos de cada categoría.
Na primeira categoría, STEM iniciación, para proxectos sinxelos realizados por alumnado de primeiro, segundo e terceiro da ESO, FP Básica ou Programa de Mellora da Aprendizaxe e Rendemento (PMAR), os centros galardoados son os seguintes:
Desafío | Centro premiado | Proxecto |
Desafío Robots | IES Isaac Díaz Pardo (Sada) | Moble de reciclaxe |
Desafío Programación | CPI A Xunqueira (Fene) | Os órganos dos sentidos |
Desafío Impresión 3D | IES Ramón Menéndez Pidal (A Coruña) | Planos para tocar |
Na segunda, STEM afondamento, para proxectos máis complexos de alumnado de cuarto da ESO e primeiro ou segundo de bacharelato, os centros gañadores son os seguintes:
Desafío | Centro premiado | Proxecto |
Desafío Robots | IES Primeiro de Marzo (Baiona) | mClon robot |
Desafío Programación | IES Val do Asma (Chantada) | Sistema de alarma |
Desafío Impresión 3D | IES Monte Castelo (Burela) | Pezas de xadrez |
PROXECTO ELABORADO ENTEIRAMENTE POLOS ESTUDANTES
O Desafío Robots consistiu nun proxecto no que nun escenario un ou varios robots realizan determinadas accións ou tarefas encamiñadas a darlle solución a unha situación que teña aplicación na realidade da vida diaria, da industria etc; mentres que o Programación tiña que xirar arredor dun proxecto tecnolóxico que dea solución a unha necesidade concreta onde se utilicen linguaxes de programación. Pola súa banda en Desafío Impresión 3D debían presentarse proxectos tecnolóxicos onde se utilice unha impresora 3D para o deseño e construción de todas ou parte das pezas da maqueta.
Todos os proxectos presentados debían estar elaborados enteiramente polo alumnado coa dotación que a Consellería realizou aos centros públicos de ensino non universitario dende o curso 2016/17, tales como equipamento de robótica educativa, placas de Comunicación e Programación e equipo de Impresión 3D.