A secretaria xeral técnica da Consellería do Mar, María Isabel Concheiro, asegurou que a Xunta de Galicia impuxo “unha penalización” a Babcock, a empresa adxudicataria dos helicópteros do Servizo de Gardacostas de Galicia, debido á inoperatividade do Pesca 2 entre os días 24 de outubro e o 1 de novembro do pasado exercicio 2019, denunciada daquela pola CIG.
Esta resposta ofreceu Concheiro no Parlamento galego, no marco da Comisión oitava de Pesca e Marisqueo, ante unha pregunta formulada polo deputado de grupo mixto Pancho Casal respecto da semana en que a aeronave estivo inoperativa no heliporto de Celeiro, situado en Viveiro, onde ten a súa base.
Neste contexto, a secretaria xeral técnica da Consellería do Mar explicou que a Administración autonómica, consciente da importancia deste servizo, “non está conforme” coa situación que se deu. A responsable autonómica manifestou que a Xunta “non tolera ningún incumprimento” dos pregos do contrato, ademais de afirmar que a inoperatividade do helicóptero de salvamento “levou á imposición dunha penalidade” á empresa adxudicataria deste servizo.
“FALLO PUNTUAL”
A avaría que se produciu na baliza, segundo Concheiro, é “circunstancial” e engadiu que non ten vinculación ou relación algunha coa “idade do helicóptero, senón que podería producirse en calquera aeronave” independentemente da súa antigüidade.
Ademais, asegurou que “desde o principio” Babcock “foi requirida, verbalmente primeiro e tamén por escrito, para que solucionase o problema o máis axiña posible, advertíndolle que, de non facelo, iniciaríase o proceso administrativo previsto”. Concheiro sostivo que “non é certo que a Xunta non obrigue a substituír os helicópteros, máis ben ao contrario, estamos vixiantes para que se cumpra o contrato asinado no momento da adxudicación e estes estean en boas condicións para que poidan prestar o servizo que teñen concedido”, recalcou.
CASAL (GRUPO MIXTO) PIDE “UNHA ALTERNATIVA”
Con todo, non conforme coa resposta ofrecida pola responsable autonómica, o deputado Casal suxeriulle que “revisasen as condicións” da adxudicación e preguntoulle se “había algunha nave substitutoria” do Pesca 2.
O parlamentario lamentou que “a información que nos chegou é que non había“, á vez que manifestou que “sería tranquilizador” para todo o sector marítimo pesquero que existise “unha alternativa” cando se producen incidencias deste tipo. Ante esta aseveración, a secretaria xeral técnica admitiu que a aeronave “non foi substituída”.
O GOBERNO AUTONÓMICO REMÍTESE AO CONTRATO
No contrato “establécense unha serie de condicións e nós, como Administración responsable, o que temos que facer neste contrato e garántolle que o facemos é estar absolutamente vixiantes para que o acordo subscrito se cumpra”, asegurou Concheiro.
Neste sentido, explicou que “os pregos son observados completamente e nos casos en que se advirte que hai incumprimento, o único que podemos facer é esixirlle á empresa que repoña a situación canto antes e desde logo penalizala no caso de que se produza algunha infracción ou falla”, sentenciou Concheiro. A conselleira, Rosa Quintana, destacou recientemente que os orzamentos deste ano recollen un incremento de máis do 50% dos fondos destinados á compra e modernización de embarcacións do servizo ata superar os seis millóns de euros.
