O Concello de Viveiro remitiu este mércores á Cruz Vermella de Lugo unha carta para pedir explicacións polo uso que ten a día de hoxe o local ubicado na avenida Martín Ledesma, dado que “está sendo utilizado para o desenvolvemento da actividade dunha autoescola“.
Segundo expón o goberno local viveirense nun comunicado, en febreiro de 2013, o Concello recibiu un escrito da Cruz Vermella de Lugo solicitando a denuncia do convenio que tiñan suscrito coa corporación municipal e coa Asociación de Familiares de Enfermos de Alzhéimer de Viveiro para a realización de obradoiros de estimulación cognitiva na súa sede.
“No escrito, explicábase que esa denuncia estaba motivada, entre outras cuestións, na necesidade de destinar o local a realizar accións dirixidas a paliar os efectos da crise económica entre a poboación máis vulnerable e que non se podían levar a cabo debido á ocupación do local, unha postura coa que estabamos dacordo”, lembra a alcaldesa, María Loureiro.
As accións eran as seguintes: actividades de reforzo escolar e traballo social coas familias; búsqueda de emprego para as persoas máis afectadas pola crise; talleres de búsqueda de emprego e prelaborais; aula de castelán, alfabetización e preparación da ESO; entrega de kits sociais (alimentación familiar, alimentación para bebés e hixiene) e servizos de proximidade para persoas maiores.
A raíz da renuncia ao convenio referido polas razóns expostas, o Concello explica que reubicou os obradoiros de estimulación cognitiva para enfermos de Alzhéimer noutras instalacións municipais, mantendo a colaboración coa asociación.
O GOBERNO LOCAL RECLAMA O INMOBLE
Na actualidade, o local da Cruz Vermella está sendo utilizado para o desenvolvemento da actividade dunha autoescola, polo que este Concello entende que non se lle está dando o uso referido no escrito anterior nin ningún outro vinculado o seu uso propio.
Tendo en conta todo canto antecede e que para a construción do inmoble se realizaron donativos da veciñanza de Viveiro, é polo que o concello solicita á Cruz Vermella Lugo as explicacións oportunas sobre o uso actual do inmoble e, tendo en conta que non se está a utilizar para o seu fin propio, a realización dos trámites necesarios para a súa cesión ao Concello.
