Un alumno do IES de Foz, o focego Alonso de Jorge Otero, gañou a Olimpíada Xeográfica de Galicia, celebrada este venres en Santiago de Compostela, concretamente na Facultade de Xeografía e Historia.
Na olimpíada participaron outros catro alumnos do IES de Foz e os cinco estudantes do centro focego competiron con alumnos e alumnas de segundo de Bacharelato de toda Galicia. Tiveron que realizar 50 probas tipo test relacionadas co temario dese curso, con gráficos, fotografías e cartografía.
Alonso de Jorge Otero recibiu como premio unha tablet e terá a oportunidade de participar na fase estatal da XI Olimpiada de Geografía de España, que organiza o Colegio de Geógrafos de España e a Asociación Española de Geografía. Terá lugar os días 24 e 25 de abril de 2020 en Madrid.
