O Concello de Burela repartirá máis de 3.000 euros en premios no desfile de Entroido da vila, que se celebrará o domingo 23 de febreiro.
Disporanse premios nas categorías infantil -con concursos para individuais, parellas ou grupos– e adulto -cos mesmos certames e tamén para carrozas, plataformas de rodas tiradas por vehículos, e charangas e comparsas, cun mínimo de dez compoñentes; estas últimas deberán realizar algún tipo de representación, baile ou música-.
O desfile sairá ás 17.00 horas e terá o seguinte percorrido: Rúa do Ril, Arcadio Pardiñas, Eijo Garay e Praza do Concello. Rematado o desfile a amenización musical na carpa sita na Praza do Concello correrá a cargo da discoteca móbil Eventec. Haberá chocolatada de balde ata a entrega de premios.
INSCRICIÓNS
A inscrición no concurso de disfraces pode efectuarse de luns a venres en horario de 9.30 a 14.00 e de 17.00 a 20.00 horas chamando aos teléfonos 982.58.11.41, 647.136.673 ou enviando un correo electrónico a casaxuventude@burela.org. O prazo para anotarse remata o vindeiro 21 de febreiro, ás 14.00 horas. O mesmo día do certame, os interesados en participar poderán inscribirse no local de Ledicia, desde as 15.30 ata as 16.30 horas.
O LUNS, BAILE NA CARPA
O luns, de 16.00 a 20.00 horas, haberá un obradoiro de cociña infantil impartido polas monitoras do Centro Medioambiental Gaia. A partir das 22.30 horas na carpa instalada na Praza do Concello terán lugar as actuación musicais do grupo Forget La France e da discoteca móbil Eventec, financiadas ambas polo CCA Burela.
DÍA DO NENO E ENTERRO DA SARDIÑA
O martes de Entroido será o Día do Neno. De 16.30 a 21.00 horas, na carpa instalada na Praza do Concello, haberá inchables, desfile infantil, obradoiro de manualidades e pintacaras, photocall e música. Finalmente, o mércores será o Enterro da Sardiña, organizado pola asociación Dambara. A saída será ás 20.00 horas, desde a avenida Arcadio Pardiñas á altura do Mesón O Poeta, para baixar por Eijo Garay, continuar por Rosalía de Castro, seguir pola Rúa da Lamestra e rematar no Areal de Penoural.
