O Concello de Burela iniciou unha campaña nas redes sociais, baixo o título ‘Súmate ao reto: queda na casa‘, que veciños, profesionais da sanidade, deportistas, docentes e membros do goberno e da corporación local aconsellan quedarse na casa como medida de contención ante o coronavirus.

Jozi e Edu, do Pescados Rubén Burela FS, usuarios da Fundación Eu Son, médicos, enfermeiras, profesorado da escola de música, persoal dos servizos sociais municipais, xogadores dos equipos de base de fútbol ou baloncesto, ou o guía do barco-museo Reina del Carmen, entre outros, animan cada un á súa maneira á poboación da Mariña Lucense a atender as recomendacións das autoridades sanitarias.

SEIS AFECTADOS NA PROVINCIA

As pezas audiovisuais aspiran a concienciar á veciñanza para que sexa responsable respecto dunha ameaza que cada vez está máis presente. Na actualidade, segundo datos oficiais, hai seis positivos confirmados na provincia de Lugo, alomenos tres deles na Mariña, os dunha parella de Foz e o dunha muller relacionada con esta familia.