Unha farmacia de Burela veuse obrigada este mércores a realizar un vídeo que publicou en redes sociais para desmentir que dúas das súas traballadoras tivesen coronavirus, despois de que se espallasen entre a veciñanza varios “ruxerruxes” en relación con supostos positivos.
Na peza audiovisual, pendurada en Instagram, a titular de Farmacia Casariego explica cun “comunicado oficial” que malia que unha das traballadoras realizou unha viaxe a Madrid e volveu con algúns síntomas similares aos do coronavirus, someteuse á proba pola doenza e deu resultado negativo.
A farmacéutica titular tamén desminte tamén ter sido infectada, despois de que se dixese “que teño a enfermidade. Estou sana e non teño síntomas que se lle parezan. Todo o noso persoal está sano e tomando as medidas de precaución necesarias”, conclúe.
Este tipo de comentarios, de seren falsos, poden xerar unha alarma social respecto de establecementos, como as farmacias, que permanecen abertas malia o estado de alarma e aos que se acode a diario -en moitos casos persoas maiores- a buscar medicamentos e produtos primeira necesidade. Unha sanitaria de Xove que si resultou infectada amosouse afectada polo espallamento entre a veciñanza dunha histeria similar respecto do seu caso.
