IniciosociedadeAlivio en Betania polos resultados de ducias de probas, todas negativas, con...

Alivio en Betania polos resultados de ducias de probas, todas negativas, con sete persoas pendentes

Prevese que se realicen tests nos vindeiros días nos xeriátricos de Burela e Mondoñedo

Publicada o

- Advertisement -

O número de casos de coronavirus nas residencias da Mariña Lucense mantense estable segundo o reconto oficial ofrecido na tarde deste mércores pola Xunta de Galicia. A estatística ofrecida polo Goberno autonómico contabiliza, con respecto ao pasado martes, dous positivos de maiores na vivenda comunitaria privada Mirador del Eo, en Ribadeo, pero segundo a dirección do centro trátase dunha actualización de datos que trascenderan con anterioridade.

No xeriátrico ribadense documentáranse días atrás dous casos de usuarios, o dun home que foi o primeiro falecido na Mariña Lucense por coronavirus e o dunha muller que recibiu a alta o pasado luns.

A raíz destes dous primeiros positivos, realizáranse probas a todos os traballadores do mesmo, oito, resultando un positivo, e tamén tests a tres dos catorce usuarios, resultando outro caso confirmado de coronavirus. O residente infectado permanece en illamento nunha habitación. O empregado, que se confinou no seu domicilio, ten a alta á espera dun segundo test e xa non entra no cómputo de casos activos do Sergas.

Na residencia Betania (Viveiro) recibiron este mércores boas novas ao longo das últimas horas. Segundo concretou a dirección do xeriátrico, ata este día 8 realizáranse probas a arredor de 110 usuarios e 36 de 38 empregados, coa totalidade dos casos negativos. Quedan pendentes os resultados dunha última quenda de probas -catro residentes, dous traballadores e unha voluntaria-.

Documentáronse ata o de agora catro positivos no xeriátrico viveirense. Deles, unha persoa foi trasladada á residencia Porta do Camiño, con prognóstico favorable e sen apenas síntomas; outros dous foron hospitalizados en Burela, dos que un recibiu a alta hospitalaria; e finalmente hai unha relixiosa en illamento, que evoluciona favorablemente e atópase á espera dunha segunda proba.

EN BURELA E EN MONDOÑEDO, Á ESPERA

A madre superiora, Sor Teresa, expón que os resultados das probas ofrecen “un alivio” e concreta que a situación no centro é “de bastante normalidade, incluso total, tendo en conta que neste tipo de xeriátricos son habituais outras patoloxías, e sempre hai incidencias, sexa unha caída, unha neumonía ou algunha outra circunstancia. Non debemos baixar a garda e seguir coas medidas de protección”, concluíu.

En Foz, tras realizarse probas á totalidade do persoal e usuarios, arredor de 73 persoas, documentáronse doce casos, cinco de maiores e outros sete de empregados.

En Burela, dous traballadores resultaron infectados. Catro usuarios e outros nove empregados que solicitaron o test a título individual deron negativo nas primeiras probas realizadas, e comprometéronse análises para a totalidade do persoal e usuarios nos próximos días, tal e como reclamaron UGT, Concello de Burela e BNG; no centro San Rafael de Mondoñedo, onde deu positivo un empregado, tamén se realizarán as revisións de xeito inminente.

ÚLTIMAS

Erika Gomes Mendes: “Fixen un traballo para saber se os caboverdianos coñecían algo de Galicia antes de vir”

-Erika, cando chegaches a Burela desde o teu país? Cheguei a Burela en 2017 e...

‘A Sacabeira’ celebrará o Día de Rosalía o 25 de febreiro en Sargadelos

O vindeiro 25 de febreiro, no Café Bar Cultural A Sacabeira, a ACR Fervenza  de Sargadelos celebra...

Denuncian que o Hospital de Burela queda só cun cardiólogo

A CIG-Saúde da Mariña denuncia que o hospital queda cun só especialista en cardioloxía...

Trabada solicita unha subvención para as cubertas do CEIP Celso Currás

O Concello de Trabada solicitou unha subvención á Xunta de Galicia para a mellora...