No mediodía deste luns déronse as primeiras altas de pacientes con coronavirus ingresados na Unidade de Coidados Intensivos (Uci) do Hospital Público da Mariña. Estas dúas persoas foron trasladadas a planta para seguir coa súa recuperación. Trátanse dunha enfermeira do centro hospitalario de Burela, veciña de Mondoñedo, e dun varón.

Así o avanzou esta tarde Cope de la Costa, nunha información que confirmaron fontes do Servizo Galego de Saúde (Sergas). Segundo o reconto oficial ofrecido no mediodía deste luns, con datos de última hora do pasado domingo, permanecían na Uci catro persoas -un número que se mantiña desde oito días atrás- e cinco en planta.

Deste xeito, o número de ingresados en camas de críticos baixa a dous pacientes, os mesmos que gañan as unidades de hospitalización, sen ter en conta as novidades -por ingresos, altas ou confirmacións de casos considerados “probables”- que se poidesen producir ao longo desta tarde.