O número de ingresados no Hospital da Mariña con coronavirus segue a minguar progresivamente desde o pasado 2 de abril, cando se produciu o tope de hospitalizacións cun total de 23. Segundo o reconto oficial do Servizo Galego de Saúde (Sergas), cinco persoas permanecen ingresadas no centro hospitalario de Burela, por seis no día de onte.
Segundo o cómputo ofrecido este mediodía, hai dúas persoas na Unidade de Coidados Intensivos (Uci) e outras tres -unha menos có mércores- en planta.
TRECE CASOS MÁIS NA PROVINCIA, PARA UN TOTAL DE 627
No tocante aos casos activos na provincial, continúa a documentarse un leve incremento, cun total de 627, 13 máis ca onte. É o cuarto día consecutivo no que se rexistra un aumento das persoas con coronavirus, con 28 positivos máis neste período.
Deles, sete permanecen en Uci, os outros cinco no Hospital Universitario Lucus Agusti (HULA). Outros 26 pacientes fican en unidades de hospitalización, dous menos ca onte -tres deles na Mariña, doce no Hospital Virxe dos Ollos Grandes e o resto no HULA. Monforte a día de hoxe segue a rexistrar cero ingresos por Covid-19.
Malia que a presión hospitalaria segue a manterse máis ou menos estable, é en domicilio onde se nota a repunta, con 15 casos máis. 26 persoas morreron na provincia por mor do coronavirus -cinco delas na Mariña- e déronse 126 altas.
492 FALECEMENTOS EN GALICIA
A Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia ascende a 6.637, deles 1.550 son da área da Coruña, 627 da de Lugo, 1.301 da de Ourense, 535 da de Pontevedra, 1.164 da área de Vigo, 1.078 da de Santiago, e 382 da de Ferrol.
Do total de pacientes positivos, 92 permanecen en Uci, 568 están en unidades de hospitalización e 5.977 no domicilio. Polo de agora, en Galicia rexistráronse 1.676 altas de pacientes e 492 falecementos. O número de PCR realizadas é de 76.129.