O reconto oficial ofrecido este sábado pola Xunta de Galicia documenta un positivo por coronavirus entre os maiores da residencia do Valadouro. Tamén informa da curación da última residente do xeriátrico de Foz que permanecía infectada, ingresada no Hospital Virxe dos Ollos Grandes de Lugo, e de que un dos usuarios de Betania (Viveiro) afectados polo virus superou a enfermidade.
Na mañá deste sábado houbo boas novas na residencia de Ribadeo. Os 40 residentes e 25 traballadores sometidos aos tests deron negativo, unha nova que por agora ofrece tranquilidade á comunidade do centro; maiores, empregados e familias.
“É a mellor das novas posibles”, asegura a directora do centro, Carmen Rubiños, que con todo salienta que “é unha pequena batalla gañada pero seguimos na loita”. A concelleira de Servizos Sociais, Mónica Freire, subliñou que as tarefas de desinfección nesas instalacións seguirán mentres dure o estado de alarma.
Freire asegurou que esta nova “reafírmanos no bo traballo que se está a facer, primeiro por parte dos centros e das súas direccións, e segundo tamén pola parte de xestión municipal que nos toca”.
DEZ CASOS NOS XERIÁTRICOS DA MARIÑA
Deste xeito, segundo a estatística oficial hai tres residentes e unha traballadora infectados na residencia de Cervo; dous usuarios afectados na vivenda comunitaria privada Mirador del Eo (Ribadeo); un maior no Valadouro e outro en Betania; e dous empregados no xeriátrico de Burela. O centro de maiores de Foz quedaría deste xeito sen infectados por coronavirus.
PRIMEIRO ANIVERSARIO, SEN POSITIVOS, EN TRABADA
Con actividades, xogos, mensaxes audiovisuais e un menú especial, usuarios e traballadores do centro de maiores de Trabada celebran o primeiro aniversario da residencia, despois de coñecer o negativo de todos os traballadores e usuarios.
No xeriátrico San Bartolomeu de Xove tampouco hai casos, nin en San Rafael (Mondoñedo), despois da curación dun obreiro infectado.
