A presión hospitalaria na provincia mantense estable, pero o número de positivos por coronavirus segue aumentando. É a conclusión que se desprende dos datos ofrecidos polo Servizo Galego de Saúde (Sergas) este sábado. Segundo a estatística oficial, documéntanse 15 casos máis ca o pasado venres, para un total de 662 na área sanitaria lucense.

Destas 662 persoas, dúas están ingresadas na Unidade de Coidados Intensivos (Uci) do Hospital Público da Mariña e outras tres en planta do centro hospitalario de Burela.

Os outros sete pacientes en unidades de críticos están no Hospital Universitario Lucus Augusti (HULA). Un total de 22 doentes permanece en hospitalización -os tres da Mariña, doce no Virxe dos Ollos Grandes e o resto no HULA-. Contabilízanse 631 casos en domicilio, 16 máis có pasado venres.

No total histórico, na provincia de Lugo houbo 26 falecementos –cinco deles na Mariña-, con 129 altas.

En Galicia, segundo os últimos datos da Xunta, morreron 509 persoas polo coronavirus, con 1.783 altas e 6.824 contaxiados.