O Sindicato de Técnicos de Enfermería (SAE) anunciou a través dun comunicado de prensa que denunciou ante a Inspección Provincial de Traballo e Seguridade Social de Lugo “as precarias condicións do material entregado aos técnicos de Enfermería” no Hospital Público da Mariña.
A central sindical esixe “que se cumpra coa normativa de prevención que se ha de aplicar para estes casos e que se garanta o seu cumprimento mediante o informe do organismo correspondente no que se notifique a idoneidade tanto das máscaras como das luvas“.
Segundo SAE, as máscaras que reciben as sanitarias “non reúnen os requisitos de comercialización europeos e mesmo o seu aspecto xera dúbidas sobre a súa eficacia”.
“Ademais entréganse extraídas do seu envase, para o que se depositan previamente sen a súa embalaxe orixinal nunha caixa de cartón reciclada, polo que se carece de garantías de que non fosen contaminadas durante a súa manipulación”, manifesta o sindicato, que engade que aos traballadores “non se lles informaou debidamente nin se lles adestrou para a posta e retirada do conxunto de equipo de protección individual (EPI) que utilizan simultaneamente”.