A Xunta de Galicia segue a manter en segredo, ao contrario que outras Administracións autonómicas, que concellos galegos están polo momento libres de coronavirus. O presidente do Executivo autonómico, Alberto Núñez Feijóo, si usou os datos e referiuse a que 140 municipios non teñen ningún positivo como apoio á hora de presentar o seu plan de desescalada.
De forma oficial, non hai infectados por coronavirus rexistrados nos municipios lucenses da Fonsagrada, Riotorto, O Vicedo, Muras, Lourenzá ou Negueira de Muñiz, na provincia de Lugo; Toques, na Coruña; Arbo ou Mondariz, na provincia de Pontevedra; e Larouco, Gomesende, Quintela de Leirado ou A Veiga (que só contabilizou un caso importado de Madrid pero xa non conta con ningún), na provincia de Ourense.
